人人都話要「走塑」，有小學老師們聯同環保商店，帶同一班稚氣未脫的小學生，齊齊走出教室，落手落腳到沙灘來一場淨灘活動。同學們親手清理灘上的垃圾，又就地收集物料製作濾水器，結合課本上學到的生態知識，實在地體驗一堂海洋保育課堂。

大人淨灘就聽得多，小學生淨灘會否變成「搞搞震冇幫襯」？浸信會天虹小學2班四年級的同學，日前由老師帶領，來到馬鞍山烏溪沙一處沙灘執垃圾。當日天氣雖然陰沉，仍無阻同學仔躍躍欲試的心情，不停問老師：「可以開始未呀？」

近50名小學生參與淨灘，合共清走6袋垃圾。

老師和工作人員為小朋友們分組和派發物資後，同學們即充滿幹勁，到處尋找垃圾蹤影。用不了多久，沙灘就變成大家的課室，面對灘上林林總總檢拾到的廢棄物，同學都表現得相當好奇，大呼奇怪，老師和工作人員則忙於解答同學的疑問，趁機上一堂生態教育課。

「執到好多塊奇怪嘅塑膠片，諗唔明點解會喺沙灘出現。」同學呂明芯從未參加淨灘活動，自言平時去沙灘只會游水，不會留下任何垃圾，對於檢到的各種塑膠製品感到疑惑，她擔心垃圾進入海洋，會危害海洋生物健康。鄭朗日則憶述，因2年前看見家人淨灘而躍躍欲試：「垃圾會污染環境，仲有可能會拮傷人。」楊子奇難忘執到死魚和皮帶組件：「好多奇怪嘢，如果唔嚟清，佢哋唔會消失！」

近50名同學最終合共清走6袋垃圾，帶隊的常識科老師王嘉蓉笑言同學們都能大開眼界：「平時講就講得多，真係畀佢哋去做都算得上係一次震撼教育。」她認為常識科很多課題都能夠應用在活動中，例如水資源、風向和氣候等，有助同學深化所學知識，亦可以反思自身的生活模式：「好多物件未必一定係垃圾，只要學懂活用資源，可以減輕許多環境問題。」

協助組織活動的環保商店BUCKET創辦人楊夏靖表示，活動能夠讓學生們切身感受到環境變化帶來的影響，「重點唔係執到幾多垃圾，而係佢哋感受到啲咩，原來現實中嘅沙灘唔係每個都咁靚。」他冀望同學們能夠從小培養環保意識，日後在成長的過程中亦能持續關注海洋保育的議題，支持不同環保運動。

除了進行淨灘，同學們此行另一個重任，是收集製作濾水器的材料，並用空膠樽收集未經處理的海水。除了沙礫、石頭外，同學亦可發揮創意，收集現場可見的物料回校嘗試。王老師解釋，能夠就地取材，由收集污水樣本，尋找製作物料都由同學一手一腳包辦，除了理論知識，學生更可進一步了解污染的成因和影響，令活動更添意義。

活動開始前，老師先行分發物資。

王嘉蓉指是次活動讓同學們大開眼界。

過程中同學不時執到奇怪的垃圾，爭相向老師發問。

楊夏靖期望淨灘活動能夠讓學生切身感受到環境變化帶來的影響。

不少同學首次參與淨灘，顯得相當興奮。

轉載自：2019年2月20日《東網》綠色先鋒：淨灘教室　小學生落手落腳執垃圾